Nick Faldo segir að Tiger eigi ekki sjéns á Opna breska

Nick Faldo telur ekki miklar líkur á að Tiger Woods sigri 4. Opna breska risamótstitil sinn í þessari viku.

Tiger sneri aftur til keppni fyrir aðeins 3 vikum eftir að hafa verið 4 mánuði frá keppni eftir bakuppskurð.

Tiger hefir sigrað í 14 risamótum en Faldo „aðeins“ 6.

Faldo heldur því hins vegar fram að frá því að Tiger sneri aftur til keppni hafi hann spilað meira keppnisgolf en hann.

„Tiger hefir spilað 2 hringi og telur að hann sé tilbúinn,“ sagði Faldo.  „Ég hef spilað 4 hringi og ég er aðeins í hlutastarfi kylfings í dag. En Tiger fór frá Congressional í síðasta mánuði og sagði að hann vissi í hverju hann yrði að vinna, þannig að við skulum bara sjá til“

„Hann virtist ansi ryðgaður – maður hlýtur að verða ryðgaður eftir svona langt frí.  Maður verður að fara út og spila.  Hann virðist ruglaður þegar hann segir að hann verði að fara í venjulega ritma sinn og spilar síðan ekkert.“

„Honum á eftir að finnast Hoylake allt öðruvísi en þegar hann vann þar 2006.  Völlurinn er lengri. Hann sló aðallega með 2-járni og 4-járni og þá virkaði það vegna þess að Tiger var upp á sitt besta.“

Faldo er ekki sá eini sem dregur sigurlíkur Wood í efa, aðrir sem það gera eru Curtis Strange og Paul Azinger.

En kannski að markmið Tiger sé alls ekki að sigra í þessu Opna breska?  Kannski er þetta bara partur af planinu að fá sig góðan í bakinu og reyna á sig og sjá hversu mikið það þolir í risamótsaðstæðum.  Það koma önnur risamót eftir þetta … en kannski Tiger komi öllum á óvart eina ferðina enn….