Morgan Pressel leggur sitt af mörkum til baráttunnar gegn brjóstakrabbameini

Í Flórída í Bandaríkjunum hefir baráttan gegn brjóstakrabbameini sjaldan verið jafnbragðgóð.  Bakarís-keðja í Flórida, Panera Bread, ákvað nefnilega að leggja sitt af mörkum til baráttunnar gegn brjóstakrabbameini og bakaði nammilegar beyglur, fylltar með kirsuberjaflögum, þurrkuðum kirsuberjum, vanillu, hunangi og púðursykri í sömu lögun og bleika slaufan er í. Um 10% af söluandvirði beyglnanna fara til bleiku slaufu átaksins í Bandaríkjunum.

Beylurnar renna út eins og… ja eins og þær gómsætu beyglur sem þær eru… en ekki skemmir fyrir að LPGA leikmaðurinn og ein helsta stjarna í liði Bandaríkjanna á Solheim Cup, Morgan Pressel var fengin til að afgreiða beyglurnar í bakaríi Panera í Boca Raton, í Flórída. Morgan var aðeins 15 ára, þegar hún missti móður sína úr brjóstakrabbameini. Þetta er sannkallað klassaframtak hjá Morgan!

Þess mætti geta að Krabbameinsfélag Íslands stendur fyrir fjáröflunarátaki með sölu á bleikum slaufum. Hver slaufa kostar 1.500,- og rennur andvirðið til baráttunnar gegn brjóstakrabbameini.  Endilega styrkið gott málefni, líkt og Morgan! Munið líka eftir að taka „bleikan” leigubíl á djamminu í kvöld, sem og aðra daga októbermánaðar, en leigubílstjórar hérlendis eru líka að styðja þetta góða málefni, með því að láta hluta af fargjaldinu renna til Krabbameinsfélagsins.

Heimild: LPGA (að hluta)