McGinley fær lífstíðaraðild að Quinta do Lago

Fyrirliði evrópska Ryder Cup liðsins Paul McGinley varð þess heiðurs aðnjótandi nú á dögunum að hljóta lífstíðarfélagsaðild í  Quinta do Lago golfklúbbnum í Algarve, Portugal.

McGinley hefir verið reglulegur gestur á þessum portúgalska golfstað ásamt fjölskyldu sinni s.l. 20 ár – en þar opnaði hann eina Paul McGinley golfkennsluskólann í heimi árið 2011 og fylgdi því eftir með fullkomnu TaylorMade Fitting Center nú í byrjun sumars

Viðurkenningin var veitt McGinley við heiðurskvöldverð af formanni klúbbsins David Proctor og kvenformanni klúbbsins Jane Reason.  McGinley sagði m.a. við það tækifæri: „Það er mikill heiður að taka við þessari heiðursviðurkenningu.  Fjölskylda mín og ég höfum komið til Algarve og sérstaklega til Quinta do Lago s.l. 20 ár og það hefir alltaf verið frábær staður og okkur fundist við velkomin.“

Quinta do Lago opnaði árið 1984 og hefir m.a. 550 alþjóðlega félagsmenn. Þar til fyrir skemmstu gátu aðeins fasteignaeigendur við golfvöllinn öðlast félagsréttindi.

Quinta do Lago er í 2000 ekru gullfallega Ria Formosa náttúruþjóðgarðinum og aðeins í 15 mínútna fjarlægð frá Faro.