Ragnheiður Jónsdóttir | mars. 2. 2014 | 09:00

LPGA: Paula Creamer sigraði í Singapúr

Það var Paula Creamer sem stóð uppi sem sigurvegari á HSBC Women´s Champions, eftir bráðabana við Azahara Muñoz.

Eftir hefðbundinn leik á 72 holum, voru báðar á samtals 10 undir pari, 276 höggum; Creamer (67 73 69 69) og Muñoz (69 72 67 70).

Par-5, 18. holan var leikin tvisvar: Í fyrra skiptið fengu Creamer og Muñoz báðar par og í seinna skiptið fékk Muñoz fugl og Creamer sigraði með erni!  Og það ekki hvernig erni sem er heldur glæsilegu 25 metra arnarpútti!!! Glæsilegt að innsigla sigurinn með svona töfrapútti!!!

„Þetta var eitt af þessum púttum, þar sem ef maður nær honum (boltanum) á réttan punkt þá fellur hann,“ sagði hún.  „En ég gæti staðið hér í allan dag og púttað og ekki komið honum í 2-21/2 metra færi.“

Creamer, sem var 4 höggum á eftir forystukonu 3. dags hefir nokkrum sinnum verið meðal 5 efstu í mótum frá því hún sigraði að US Women´s Open risamótinu, en hefir ekkert sígrað síðan þá, þ.e. 2010.

Hún varð í 3. sæti í HSBC mótinu í Singapúr í fyrra og var tvisvar T-3 í upphafi þessa árs þ.e. á  Women’s Australian Open og  the Bahamas LPGA Classic.

„Það er búið að bíða lengi eftir þessu,“ sagði Creamer eftir að sigurinn var í höfn.

Ástralska golfdrottningin Karrie Webb, sem búin var að leiða alla 3 fyrstu mótsdagana átti afleitan lokahring upp á 74 högg, en landaði engu að síður 3. sætinu lék á ergilegu 1 höggi meira þær stöllur Creamer og Muñoz eða samtals á 9 undir pari, 277 höggum (66 69 70 74).

Fimm kylfingar deildu síðan 4. sætinu, allar á samtals 7 undir pari, en það voru þær: Suzann Pettersen, Inbee Park, Morgan Pressel,  So Yeon Ryu,og  Angela Stanford.

Hin 16 ára Lydia Ko varð ein í 15. sæti á samtals 2 undir pari.

Til þess að sjá lokastöðuna á HSBC Women´s Champions SMELLIÐ HÉR: