LET & LPGA: So Yeon Ryu og Haeji Kang leiða á Ricoh Women´s British Open eftir 1. dag

Ricoh Opna breska risamót kvenna hófst í dag á Royal Liverpool golfvellinum í Hoylake.

Það eru tvær kóreanskar sem deila forystunni eftir 1. dag, þær So Yeon Ryu og Haeji Kang sem voru á 2 undir pari, 70 höggum.

Þetta er hæsta skor í 18. holu keppni mótsins frá því það varð risamót 2001 og greinilegt að keppendur áttu í vandræðum með þröngar brautirnar og komast hjá þykkum karganum í rokinu.

Haeji Kang frá Suður-Kóreu

Kang sagði m.a. eftir hringinn: „Ég byrjaði á skolla en tókst að ná mér upp úr því og halda ró minni. Sérstaklega í þessháttar risamóti verður maður að vera rólegur Járnaaðhöggin mín voru næstum öll 6 metra frá pinna.“

So Yeon Ryu, sem eins og allir vita sigraði á Jamie Farr Toledo Classic á LPGA í ár  vann Hanwha Finance Classic á kóreönsku LPGA í síðustu viku, en eitthvað hefir farið hljóðar um það. Hún var með 5 fugla og 3 skolla í dag.

Þetta er í fyrsta sinn sem hin 22 ára Ryu spilar á Opna breska. Hún sagði eftirfarandi eftir hringinn: „Þetta er í fyrsta sinn sem ég spila á Opna breska og í fyrsta sinn sem ég kem til Englands, þannig að allt er ný reynsla fyrir mig.“ Hún sagði að það gæti líka hvesst heilmikið í Kóreu og hún væri vön aðstæðunum.

Áhugamaðurinn enski Charley Hull er í 3. sæti á 71 höggi, en sætinu deilir hún með risastórum hópi kylfinga m.a. Ai Miyazato og Jiyai Shin.

Nr. 1 á heimslista kvenna, Yani Tseng, sem á titil að verja var á sléttu pari, 72 og deilir 12. sætinu ásamt enn öðrum  stórum hópi sem í er m.a. yngsti keppandi mótsins Lydía Ko frá Nýja-Sjálandi.

Lexi Thompson er á 2 yfir pari og deilir 42. sætinu og hin skoska Carly Booth átti afleitan dag, var á 5 yfir pari, 77 höggum og deilir 95. sætinu.

Til þess að sjá stöðuna á Ricoh Women´s British Open eftir 1. dag SMELLIÐ HÉR: