Kristján Þór og Ólafur Björn keppa á Opna breska áhugamannamótinu

Landsliðskylfingarnir Kristján Þór Einarsson úr GK og Ólafur Björn Loftsson úr NK verða á meðal keppenda í Opna breska  áhugamannamótinu sem fram fer á Royal Troon vellinum 18.-23. júní næstkomandi.

Opna breska áhugamannamótið er eitt sterkasta áhugamannamót sem fram fer á ári hverju. Fyrstu tvo keppnisdagana er leikinn höggleikur og komast 64 efstu kylfingarnir áfram í næstu umferð og þá tekur við holukeppni þar til að einn kylfingur stendur uppi sem sigurvegari.

Ólafur Björn náði ágætum árangri í mótinu í fyrra en þá tapaði hann naumlega í bráðabana í 64-manna úrslitum fyrir Andrew Sullivan sem þá var efsti evrópski kylfingurinn áhugaheimslistanum. Kristján Þór er að taka þátt í mótinu í fyrsta sinn. Þeir hafa báðir leikið í bandaríska háskólagolfinu í vetur og koma því vel undirbúnir í mótið. Þeir taka jafnframt þátt í St. Andrews Trophy Links mótinu sem hefst á föstudag í St. Andrews en þar verða margir sterkir áhugakylfingar meðal keppenda.

Hér má sjá þátttakendalistann í Opna breska áhugamannamótinu.

Heimild: golf.is