Ragnheiður Jónsdóttir | mars. 14. 2013 | 09:30

GKG: Opið stutta spils mót til styrktar keppnishópum GKG í Kórnum laugardaginn 16. mars n.k.

Á laugardag n.k. verður haldið í fyrsta sinn opið stutta spils golfmót í Kórnum til styrktar keppnishópum GKG, en þau halda í æfingaferð til Spánar í apríl. Mótið fer fram í æfingaaðstöðu GKG. Mótið fer fram í æfingaaðstöðu GKG og kostar einungis 1.000 kr. Glæsileg verðlaun í boði.

Um er að ræða stöðvakeppni (alls 10 stöðvar), þar sem ákveðnum fjölda bolta er vippað eða púttað á hverri stöð og árangur gefur ákveðið skor. Samtals er parið á „vellinum“ 71. Sjá hér fyrir neðan skorkortið og mynd af vellinum. Ágæt reynsla er komin af þessum velli á æfingum okkar keppnishópa sem og landsliðshópa.

Fyrirkomulag:

Hægt er að keppa í fjórum 90 mínútna hólfum frá kl. 10-16 (10-11:30; 11:30-13:00; 13-14:30; 14:30-16:00). Pláss er fyrir takmarkaðan fjölda í senn. Miðað er við að tveir og tveir leiki saman og þá geta 20 tekið þátt í hverju tímahólfi (alls 80 manns). Þetta er kjörið tækifæri að taka þátt í skemmtilegu stutta spils móti sem reynir á hæfileikana í vippum og púttum, og styrkja krakkana í leiðinni.

Skipulag:

Alls hefur hver ræsing 90 mínútur til umráða:

Þjálfari fer yfir stöðvarnar með hópnum og útskýrir reglur (10-15 mín);

Keppendur fá um 10-15 mínútur til að hita upp og prófa einhverjar stöðvar;

Keppendur raða sér á stöðvar og hefja leik á sama tíma, ca. 50 mín

Skil á skorum, ca. 10-15 mín.

Ef eitthvað er óskýrt þá er þjálfari á staðnum til útskýringa.

Keppnisfyrirkomulag:

Keppt er í einum opnum flokki og verða veitt verðlaun fyrir 3 bestu skor með og án forgjafar. Keppendur fá ¾ af sinni forgjöf eins og hún er skráð á golf.is. Ef keppandi er ekki með skráða forgjöf þá er miðað við 36 og ¾ af þeirri tölu.

Verðlaun eru frá N1, Golfbúðinni Hafnarfirði, og Golfverslun GKG.

Keppandi getur einungis unnið til verðlauna annaðhvort með eða án forgjafar.

Ef tveir eða fleiri keppendur eru jafnir í sæti þá gilda stöðvar 7-9, síðan 4-9, loks 3-9, svo 2-9. Ef enn er jafnt þá skal varpa hlutkesti.

Skráning:

Skráning fer fram með því að senda tölvupóst á ulfar@gkg.is og gefa upp fullt nafn, klúbb, kt. og forgjöf. Mótið er opið öllum kylfingum. Taka skal fram á hvaða tíma þú vilt leika, en hafa ber í huga að fyrstir koma fyrstir fá.

Mótsgjald er kr. 1.000 og skal greitt með peningum enda enginn posi á staðnum.

Sjá mynd hér fyrir neðan af vellinum og skorkortinu.

Á stöðvum 5-7 er víti fyrir að vippa í vegginn. Ef bolti liggur við vegginn má færa þannig að staða náist, þó ekki nær holu.

Heimild: GKG 
Texti: Úlfar Jónsson