Axel: „Náum að klikka saman ég og Skaginn“

Nú um helgina fór fram fyrsta mótið á Eimskipsmótaröðinni, Egils Gull mótið uppi á Skaga. Sigurvegari í karlaflokki varð Axel Bóasson, úr Golfklúbbnum Keili, í Hafnarfirði. Axel lék á samtals 6 yfir pari, 222 höggum (70 74 78) og átti 2 högg á næsta keppanda.  Golf 1 tók stutt viðtal við Axel.

Golf 1: Axel, innilega til hamingju með sigurinn, þetta er frábær árangur – þú endurtekur leikinn frá því fyrir 2 árum  – Kanntu svona vel við þig uppi á Skaga?

Axel:  Já, ætli það ekki, við bara náum að klikka saman ég og Skaginn.

Golf 1: Eru ekki mikil viðbrigði að koma frá Mississippi og spila í roki og kulda á Garðavelli?

Axel:  Það þarf alltaf að aðlagast aðstæðum aðeins. Þetta eru viðbrigði, hvað þá þegar maður hoppar í keppnisgolf. Annars er gaman að koma heim – Þetta átti aðallega að vera skemmtun og það var æðislegt að spila með strákunum. Að vinna var svo bara bónus.

Golf 1: Hvernig fannst þér Garðavöllur?

Axel: Mjög góður. Greenin rúlluðu vel, það var nóg gras og Skaginn stóð bara undir sínu – þó veðrið hafi mátt vera betra, en það er auðvitað ekki upp á Skagann að klaga.

Golf 1: Nú varstu í forystu allt mótið og gafst hvergi eftir, hvernig ferðu að því að halda svona einbeitingu?

Axel: Þetta er allt rútína og maður  verður að halda henni. Ég fór aðeins út úr henni á síðasta degi þá fór þetta niður á við.  Þetta snýst mikið um rútínuna.

Golf 1: Hver eru plönin fyrir sumarið ?

Axel: Ég verð að keppa í Skotlandi og Englandi  á sterkum áhugamannamótum í júní og svo tekur við liðakeppni í byrjun júlí. Ég ætla síðan að taka þátt í  landmótinu og sveitakeppninni, þetta er svona, það sem er komið – annað verður að ráðast.

Golf 1: Ætlarðu að reyna að komast inn á mótaraðir erlendis í framtíðinni?

Axel: Já það togast á hvort það verður í Bandaríkjunum eða Evrópu. Maður hallast að Evrópu. Fyrst reyna samt flestir að spila á Míni-túrum, til þess að fá reynslu.   Ég vil ná inn á Evrópumótaröðina, en vil vinna inn reynslu fyrst.