Darren Clarke verður meðal þátttakenda á Opna írska

Í gær voru golffréttamiðlarnir yfirfullir af fréttum um að meiðsl í nára hefðu komið í veg fyrir að sigurvegari Opna breska 2011, Darren Clarke, tæki þátt í Opna bandaríska, sem hefst eftir 3 vikur.

Clarke sem býr í Portrush á Norður-Írlandi og er heiðursfélagi í einum flottasta klúbbi þar í landi, Royal Portrush, ætlar samt ekki að taka sér lengra frí en 4 vikna til þess að fá sig góðan af meiðslunum í nára, sem blossuðu upp á BMW PGA Championship í Wentworth, nú um helgina.

Í dag tilkynnti hann nefnilega að hann yrði með á Opna írska, sem fram fer eftir rúmar 4 vikur og hefst fimmtudaginn 28. júní 2012.

Um það hafði Darren Clarke eftirfarandi að segja: „Staðreyndin er að meiðslin hamla því að ég spili opinberlega fyrr en á Dunluce vellinum eftir mánuð […] Allir á N-Írlandi telja niður stundirnar fram að því að mótið hefst og ég er einn af þeim.“

Opna írska fór síðast fram á Norður-Írlandi 1953 og þá vann Skotinn Eric Brown í Belvoir Park Golf Club í suðurhluta Belfast. Þetta er í 10. sinn sem Opna írska fer fram á Norður-Írlandi og í raun í 1. sinn frá stofnun The European Tour árið 1972, þ.e. fyrir 40 árum.

Mótið hefir þrívegis farið fram á  Royal Portrush; í fyrsta sinn 1930 þegar Englendingurinn  Charles Whitcombe vann; í annað sinn 1937 þegar enn annar Englendingur, Bert Gadd vann og síðast 1947 þegar Írinn Harry Bradshaw vann fyrri af tveimur Opnu írsku titlum sínum (þann síðari tók hann í norðurhluta Belvoir Park, árið 1949).

Heimild: europeantour.com