Kínverski undraunglingurinn Guan Tianlang – 14 ára – stefnir á að taka þátt í Opna breska

Kínverski undrakylfingurinn ungi, Guan Tianlang, 14 ára er nú meðal sterkra þátttakenda í International Final Qualifying- Asia, þar sem allir eru að reyna að ávinna sér þátttökurétt á Opna breska 2013.  Úrtökumótið hefst á morgun.

Með þessu er 14 ára unglingurinn að reyna að tryggja sér sæti í 2. risamóti sínu en hann hefir þegar áunnið sér þátttökurétt í The Masters n.k. apríl.

Kínverski undrakylfingurinn, 14 ára, Guan Tianlang, sigrar á Asian Amateur

„Ég hef spilað í nokkrum atvinnumannamótum áður og það er alltaf gaman að spila með atvinnumönnunum. Ég get lært svo mikið af þeim og fæ reynslu af því að spila í atvinnumannsmótum. Þannig að ég hlakka til IFQ-Asia,“ sagði Guan.

Cheng-tsung Pan frá Taiwan, sem varð í 2. sæti á eftir Guan í nóvember og er hæst rankaði kylfingurinn á heimsáhugamannalistanum frá Asíu (þ.e. í 5. sæti) og tvöfaldur Asia-Pacific Amateur Champion, Hideki Matsuyama sem varð fyrsti japanski áhugamaðurinn til þess að spila í the Masters 2011, taka einnig þátt.

Matsuyama er aðeins hluti af mjög sterkum japönskum kylfingum sem taka þátt, en þeirra á meðal eru Kodai Ichihara, Yuta Ikeda, Masanori Kobayashi og Masamichi Ito, sem gerðist atvinnumaður í desember og var meistari síðasta árs á Faldo Series Asia.

James Byrne, frá Skotlandi sem gerðist atvinnumaður eftir að eiga sæti í sigurliði Breta&Íra í Walker Cup 2011 og sem spilar nú á Asian Tour, ætlar sér líka þátttökurétt í Opna breska.

Meðal þeirra sem spenningur er fyrir í Thaílandi er hin rísandi golfstjarna Arnond Vongvanji, sem blóðlangar til þess að keppa á Opna ásamt löndum sínum þeim Thaworn Wiratchant og Thongchai Jaidee.

Meðal annarra sem gera sér vonir um að komast á Opna breska eru landar Vongvanji, Thaílendingarnir Prom Meesawat og Kiradech Aphibarnrat og eins Indverjarnir Gaganjeet Bhullar og Anirban Lahiri, ásamt Siddikur Rahman frá Bangladesh og Miguel Tabuena frá Filipseyjum.

Landar Tianlang, Wu Ashun og Hu Mu munu einnig keppa í úrtökumótinu.

International Final Qualifying fyrir Opna breska mun síðan líka fara fram í Royal Johannesburg and Kensington golfklúbbnum í Suður-Afríku, 5.-6. mars. Síðan fer fram annað mót IFQ America í Gleneagles Country Club í Texas 20. maí og IFQ Evrópa í Sunningdale í Englandi, þ. 24 júní n.k.