Paul Casey verður frá keppni í 2 mánuði vegna meiðsla í snjóbrettaslysi

Eftir að hafa átt við meiðsli að stríða í rifbeinum og tá síðastliðin 2 keppnistímabil, þá hlakkaði Englendingnum Paul Casey loks til þess að hefja keppni frískur 2012.

En af keppni verður víst ekkert á næstunni, þar sem Casey sneri sig úr axlarlið í snjóbrettaslysi. Skv. frétt AP mun Casey missa af keppni fyrstu 2 mánuði ársins 2012.

Þ.a.l. verður Casey ekki með í keppnum Evrópumótaraðarinnar í Miðausturlöndum – þ.á.m. Abu Dhabi Golf Championship þar sem hann er tvöfaldur meistari. Einnig er vafi um hvort hann taki þátt í World Golf Championships-Accenture Match Play Championship – þar sem Casey hefir tvívegis orðið í 2. sæti á s.l. 3 árum. Mótið fer fram síðustu vikuna í febrúar.

Casey lauk 2011 keppnistímabilinu sterkt þegar hann varð tvívegis meðal 10 efstu af síðustu 3 mótum sem hann tók þátt í, á PGA mótaröðinni, jafnframt því sem hann varð í 3. sæti á Chevron World Challenge. Hann vann tvisvar í Volvo Golf Champions á Evrópumótaröðinni og á Shinhan Donghae Open í Kóreu.

Snjóbrettaslysið og axlarmeiðslin gætu sett strik í reikninginn með að Casey hljóti sæti í Ryder Cup, sem fram fer nú á árinu í september í Medinah Country Club. Casey var meðal 10 efstu á heimslistanum fyrir 2 árum en hlaut ekki náð fyrir augum Monty í Ryder bikarnum 2010, þegar hann náði ekki að komast sjálfkrafa í liðið.

Heimild: PGA Tour