Ragnheiður Jónsdóttir | febrúar. 12. 2018 | 18:00

Nýju strákarnir á Evróputúrnum 2018: Andrea Pavan (27/33)

Það voru 33 kylfingar sem tryggðu sér keppnisrétt á Evrópumótaröðinni í gegnum lokaúrtökumót Evrópumótaraðarinnar, sem fram fór dagana 11.-16. nóvember sl. á Lumine golfstaðnum á Spáni.

Það voru 25 efstu og þeir sem jafnir voru í 25. sætinu, sem tryggðu sér keppnisrétt.

Nú nýlega voru kynntir þeir sem deildu 12. sætinu á samtals 16 undir pari en það voru: Pep Angles og Gonzalo Fernandez-Castaño frá Spáni og Laurie Canter frá Englandi. Síðan voru þeir 3 kynntir sem deildu 9. sætinu, sem léku á 17 undir pari, hver en það voru þeir Josh Geary, frá Ástralíu; Mark Foster frá Englandi og Connor Syme frá Skotlandi. Síðast var sá kynntur sem var einn í 8. sætinu á samtals 18 undir pari, en það var Svíinn Kristoffer Broberg.

Í dag verður byrjað að kynna þá 6 „stráka“ sem deildu með sér 2. sætinu en það voru: Jacques Kruyswijk frá S-Afríku, Andrea Pavan, Ítalíu; Pontus Videgren, Svíþjóð; Anders Hansen og Jeff Winther,frá Danmörku og Charlie Ford, Englandi, en þeir léku allir á samtals 19 undir pari, hver.

Í dag verður byrjað á að kynna Andrea Pavan.

Andrea Pavan fæddist 27. apríl 1989 í Róm, Ítalíu og er því 28 ára. Hann er 1,91 m á hæð og 84 kg.

Pavan varð 16 ára,  ítalskur meistari áhugamanna í höggleik 2005 og í framhaldi af því ákvað hann að taka þátt í bandaríska háskólagolfinu. Hann var í 4 ár við nám í Texas A&M og spilaði með háskólaliðinu, þ.á.m. vann hann einstaklingshluta móts árið 2010 og var hluti liðs sem sigraði árið 2009 NCAA Men’s Golf Championship.

Hann átti farsælan áhugamannaferil; vann fjölda móta á Ítalíu og varð m.a. í 2. sæti í hinu virta European Amateur.

Atvinnumennskan

Pavan gerðist atvinnumaður árið 2010.  Honum tókst ekki að komast í gegnum lokaúrtökumót fyrir Evrópumótaröðina og PGA Tour og  spilaði fyrst í boði styrktaraðila og á Áskorendamótaröðinni 2011.  Það var 2. sætið á  Kärnten Golf Open, þar sem hann var í forystu mestallt mótið, sem tryggði honum kortið á Áskorendamótaröðinni. Fyrsti sigur Pavan á Áskorendamótaröðinni kom snemma árs á Norwegian Challenge. Síðan vann Pavan aftur á Apulia San Domenica Challenge Tour Grand Final og tryggði hann þannig kortið sitt á Evrópumótaröðinni 2012.

Þar gekk ansi brösulega þannig að Pavan hefir þurft að taka þátt í lokaúrtökumótum Q-school Evrópumótaraðarinnar bæði 2012 og 2014. Árið 2012 komst Pavan ekki gegnum lokaúrtökumótið og varð að spila aftur á Áskorendamótaröðinni árið 2013.  Honum gekk vel – hann sigraði þannig 7. júlí 2013 á Bad Griesbach Challenge Tour og 8. september 2013 á Open Blue Green Côtes d’Armor Bretagne og var aftur farinn að spila á Evrópumótaröðinni 2014.  Aftur gekk ekki sem best og varð Pavan því aftur að fara í lokaúrtökumót Q-school, með þeim árangri eins og áður segir að hann varð í 23. sæti, þannig að hann spilaði á Evrópumótaröðinni 2015.

Það ár 2015 tók Pavan þátt í 21 móti á Evrópumótaröðinni og var besti árangur hans T-20 árangur á AfrAsia Bank Mauritius Open. Hann komst 12 sinnum gegnum niðurskurð og það dugði ekki til þess að halda sér á Evróputúrnum 2016 og það ár og reyndar einnig í fyrra, 2017, spilaði Pavan á Áskorendamótaröðinni.

En nú er öldin önnur. Eftir glæstan T-2 árangur á lokaúrtökumóti Evróputúrsins er Pavan kominn með kortið sitt og full spilaréttindi á Evróputúrnum.

Sem stendur er Pavan nr. 722 á heimslistanum.